المقال دا من مدونتي القديمة , للأسف مقدرتش انقلها بالتعليقات اللي كانت عليها فـ هسيب صور للتعليقات تحت في آخر المقال

تنبيه ! الكلام في المقال دا شخصي وبيحكي تجربة شخصية لذلك هتلاقي تفاصيل شخصية كتير فيه , ديماً لو حد بيحكي عن تجربة لنجاح شئ معين معاه هتلاقيه ديماً بيركز علي الجزء الناجح فقط , انا هنا حاولت اوضح المعاناة كمان بتعمق طفيف بالتفاصيل , لذلك وجب التنبيه !

في الحقيقة إترددت كتير جدا في إزاي ابدأ المقال دا , او الموضوع دا بلاش نسميه مقال مؤقتاً

قبل ما اتكلم انا هحاول انظم الكلام بحيث ميكونش مٌمل ويكون سهل القراءة و حاول تقرأه كله علي قد ما تقدر علشان متبنيش فكرة غلط عن الكلام الموجود ”

انا بدأت في كتابة الكلام دا يوم 18 مايو 2016 الساعة 10 مساءاً

أذكر إني بعد 28 مايو 2015 إللي هو عيد ميلادي الـ 21 قررت إني لازم قبل ما عيد ميلادي الـ 22 يجي لازم أحقق هدف كبير نسبياً بالنسبالي , هدف يغير حياتي للأحسن أو علي الأقل أعمل حاجة أفتخر بيها ولو حتي فخر مؤقت

إللي يعرفني شخصياً يعرف إني شخصية حالمة ( بحلم كتير ) خيالي بعض الشئ و ناس كتير من إللي اعرفهم بيسخروا مني كتير بسبب الموضوع دا , حتي المقربين منهم

موضوع السُخرية دا بالنسبالي شئ مُزعج , لكني بحاول أحول الطاقة السلبية من السخرية لطاقة إيجابية تساعدني علي إني أثبتلهم العكس

المٌهم نرجع لموضوعنا ……

كان جاتلي فكره من حاولي سنة و نص , او سنتين ( مش متذكر بالظبط إمتي ) و حاولت وقتها انفذها كـ شئ بدائي كده علشان اشوف هل مٌجديه ولا لا

الفكرة جاتلي لما كان عندي إمتحان ومكانش معايا كتاب المادة ولا أي ورق في المادة , وفي نفس الوقت مكنتش لاقي حد يبعتلي أي حاجة و انا شخصياً مبحبش أدخل اسأل علي جروب الدٌفعة لذلك فكرت يومها

ليه ميكونش فيه تطبيق علي الموبايل الاقي عليه كل الورق و الكتب الخاصه بالكٌلية ؟؟؟؟؟!!!

كان فيه علامات إستفهام كتير وعلامات تعجٌب كتير في دماغي وقتها

وقتها فعلا مكنتش عارف ابدأ إزاي

بس وقتها حاولت أنفذ الفكرة ك تطبيق بسيط , بيعرض الفكرة فقط لكنه غير ديناميكي

هحاول أرفع صوره التطبيق لاحقاً

ثم بعد ذلك بدأت في عمل ما يُسمي بالـ Business Model

للفكرة كامله و حاولت قدر المستطاع دراسة أغلب الإحتمالات المٌمكنه و الأفكار الإضافية إللي مٌمكن أضيفها للفكرة الرئيسية

مع الوقت الفكرة بقت أفكار و قُلت أجمعهم كلهم في موقع و دا هيكون المشروع المنشود إللي لازم انفذه قبل عيد ميلادي الـ22

لكن كان فيه مشكلة انا وقتها زي ما ناس كتير من صحابي يعرفوا كنت شغال فقط Front End Web Developer

او كما يسمونها بالعربية مطور الواجهة الأمامية للويب

لذلك كان لابد من وجود Back End Dev معايا لإتمام المشروع كامل

لو إنت مش فاهم النقطة إللي فوق دي هحاول اوضحهالك هنا في كام سطر ( بص يا سيدي أي موقع في الدٌنيا علشان تشوفه قدامك كده بيكون فيه جزئين رئيسيين الجزء الأول كل ما يظهر أمامك علي الشاشه و دي إللي بيعملها هو كما ذكرت بالأعلي فرونت إند ديفيلوبر , أما اي حاجة تانية بتتم بين السرفر و الداتا بيز ف دي مٌهمة الباك إند ديفيلوبر بس كده ) أتمنى تكون فهمت 🙂

نرجع للكلامنا

انا كنت شغال فرونت إند إذاً كان لابد من شخص شغال باك إند يساعدني نكمل المشروع

دورت كتير في الأول لحد ما تعبت بس بعدين كلمت واحد صاحبي و قُلتله كل التفاصيل و قولتله هيتكلف كام لشغله ك باك إند

قالي يومها تقريبا 17 ألف جنية مصري , انا مكانش عندي مانع إني ادفع بس كان كل همي إن المشروع يتنفذ حاولت أجمع المبلغ لكن جمعت حوالي ربع المبلغ و قلت خلاص مش هقدر انفذ المشروع دلوقتي

وفعلاً وقفت كل حاجة لكن بعد فترة قُلت ليه متعلمش PHP و Back End لإني بحتاج اوقات كتير شخص يكون شغال بيهم عشان يساعدني , لوانا اتعلمتهم هيكون الـ Hiring Hour بتاعتي سعرهاهيكون أعلي من دلوقتي

بالفعل أنا كنت قبل كده إتعلمت PHP لكن بدأت احاول اطبق واعمل مشاريع بيها

وعملت أول مشروع بيها كان CMS الكلام دا كان الترم الأول يعني من حوالي 4 شهور

بعدها عملت موقع عبارة عن محرك بحث للموبايلات لكن بمميزات مش موجوده (مش نشرته حتى اللحظة ) لكني وقفت الشغل فيه لإني بعد ما عملته قُلت ليه مجربش أبني انا لوحدي مشروع الكلية دا

انا فاكر إني كنت بدأت انفذ في الـ Wireframes الخاصة بالتصميم وانا مروح من إمتحانات الترم الاول

وكنت ناوي إني اول ما اخلص امتحانات الترم الأول إني هبدأ انفذه كامل كـ تصميم وبرمجة لوحدي في إجازة نص السنة فقط

وبالفعل الإجازة جت و بدأت انفذ فيه

و هنا كانت تجربة مؤلمة جدا محدش من صحابي عرف إللي مريت بيه غير كام شخص

كان كل همي في الفترة دي إني لازم اخلص المشروع قبل الترم التاني , لذلك كنت اوقات كتير مبنامش , وكان فيه اوقات كنت بسافر القاهرة وارجع اكمل شغل لدرجة إني في مره فضلت صاحي اكتر من يومين متواصلين

لدرجة إني بعد ما كنت قربت أنتهي منه كنت دخلت في فترة إكتئاب شديدة مش حابب اتذكرها تاني صراحة 😀

خلصت الإجازة بحلوها ومٌرها و كنت خلاص قربت انتهي من المشروع

وبالفعل خلصته في أول شهر ف الترم التاني

و نشرته في دفعة تانية كهرباء جامعة الزقازيق كـ بداية , في البداية الناس كانت ردود أفعالها غريبه تجاه الموقع (كانوا خايفيين منه ) لكن سرعان ما بدأت اشوف ردود أفعال كويسه جدا للناس بعد ما فتحوا الموقع وجربوه و شافو الفديو التعريفي إللي كنت عامله

اه نسيت اقولكم إني نشرت الموقع في البداية من غير ما حد يعرف إني انا اللي عامله حتي الفديو كنت مغير صوتي فيه 😀

بعدها بدأت انشر الموقع في دفعة جديده وهي دفعة تانية مدني

إقبال الناس علي الموقع كان غير توقعاني خالص , كان يومياً بيكون فيه عدد كبير جدا من الطلبة المسجلين في الموقع تقريبا 80% منهم كان بيفتح كل يوم

فيه تفاصيل كتير كنت حابب اقولها لكن دا اللي متذكره دلوقتي 😀

حتي اللحظة أنا متكلمتش عن الموقع ولا عن أي مميزات فيه

هحاول في المقال دا اوضح كل مميزات الموقع علي قد ما اقدر

اه انا اغلب الحاجات اللي موجوده في الموقع دي عبارة عن حل لـ مشاكل واجهتني في الدراسة

مٌمتع إنك تحل مشاكلك في الكُلية بالكود صح 😀

نبدأ نشرح الموقع بالتفصيل بقا

نبدأ بالإسم

INOVBOT
اسم الموقع مكون من كلمتين و هما

اولاً Inov و هي من Innovation

و Bot و دا معناها كما في Cambridge Dictionary

a computer program that works automatically, especially one that searches for and finds information on the internet

دا بالنسبة للإسم نيجي لمميزات الموقع

  1. نقطة تواصل ما بين الدكاترة و المٌعيدين و الطلبة
  2. جميع الكتب و المذكرات الخاصة بالكلية تقدر توصلها في أي وقت
  3. جميع المحاضرات والسكاشن المصوره بالفديو
  4. جميع الأخبار اللي بتحصل في السكشن او الدفعة بتاعتك
  5. ما يُسمى بالـ TodoList وهي كل حاجة مطلوبة منك في الكلية
  6. جدول الكلية الخاص بيك
  7. Daily Time Table
  8. إشعارات مع كل بوست يتم نشره من خلال هيئة التدريس
  9. كومنتات علشان لو حابب تتناقش مع الدكتور
  10. لكل بوست مجموعة من الـ reaction الشبيهه بالفيسبوك عشان لو حابب تعبر عن شعورك تجاه كلام الدكتور
  11. في مميزات تانية كتير ممكن تكتشفها بنفسك لو كٌنت طالب و مسجل في الموقع

خلينا نشرح كل نقطة علي حدة

1- الموقع فيه حاجة اشبه بالتواصل مابين الدكتور والطالب

فيه دكاتره كتير اعرفهم مبيحبوش يتواصلوا مع الطلبة من خلال فيسبوك بسبب انهم ممكن حد يدخل يحتك فيهم و يعمل مشاكل و ميعرفوش يوصلوا للشخص دا

في الموقع كل طالب بيكون مسجل في الموقع احنا متأكدين من جميع بياناته وبيتم مراجعتها لكن الدكتور مبيعرفش يوصل للبيانات دي يعني الدكتور لو فيه طالب بيعلق علي بوست عنده الدكتور بيشوف الاسم الاول فقط للطالب

النقطة دي حفاظاً علي خصوصية الطالب و في نفس الوقت لو فيه اي مشكلة احنا ممكن كإدارة الموقع نتدخل و نحل اي نزاع ممكن يحصل

النقطة دي مُهمة في ايه

لو حضرتك دكتور ممكن في اي وقت تدخل تبعت للطلبة اي كلام في أي وقت , و حضرتك ممكن وانت بتنزل البوست تتحكم في نقطة هل حابب تخلي البوست دا بكومنتات و رياكشنز ولا لا

يعني لو مش حابب حد يتناقش مع حضرتك ممكن بكبسة زر تعمل كده تنزل البوست و الطلبة يشوفوه وخلاص

زي ما الصوره موضحة كده

post-300x181
فيه فوائد كتير للنقطة دي , ممكن حضرتك مش هتنزل بكره , بدل ما انزل يوم كامل عشان احضر المحاضرة , لا حضرتك هتعرفني قبلها بالليل مثلاً

ممكن حضرتك تشارك اي حاجة مع الطلبة سواء صور او فديو , وهضيف حاجات تانية كتير قريب مش هقف علي كده بس

2 – جميع الكتب والمذكرات الخاصة بالكلية موجوده علي الموقع

انا العامل الاكبر اللي خلاني اعمل الموقع دا من البداية هو اني بواجه صعوبة في الوصول للمحتوي اللي بدرسه اونلاين و لذلك كان لازم حل

الموقع دلوقتي للدفعتين اللي موجود فيهم عليه

جميع ورق محاضرات الدكاترة و جميع ورق المعيدين و جميع الشيتات و الامتحانات الخاصة بالسنين اللي فاتت

ببساطة جميع الورق الخاص بالكلية بتاعتك هتلاقيه عليه

مين اللي بيرفع الكلام دا ؟

طلبة زملائك هما اللي بتكون دي مهمتهم

3- جميع المحاضرات والسكاشن المصوره بالفديو

عندنا في محاضرات كتير و سكاشن مصوره لكن للأسف مفيش نظام ومبتبقاش عارف اي ترتيب ولا حاجة ليهم

لا ع الموقع الامور مرتبة خالص زي ما الصوره موضحه

viddir-108x300

4- جميع الأخبار اللي بتحصل في السكشن او الدفعة بتاعتك

في كل سكشن عندك لو دفعتكم فيها سكاشن هتلاقي حد إسمه مشرف للموقع

المشرف دا مهمته إنه ينزل جميع الاخبار اللي بتحصل في السكشن بتاعك و كذلك المحاضرة واي حاجة تخصك , بيكون ليه لوحة تحكم مخصوص بتمكنه من كده

دي نقطة انا شخصياً كنت مُفتقدها جدا , بسبب إني مش متابع اوي فـ كان بيفوتني حاجات كتير في الكلية

5- Todo List

دي بقى من الحاجات اللي هتعجب ناس كتير

لو فيه النهارده سكشن و المٌعيد طلب حل شيت معين او الدكتور عمل كده وانت محضرتش , المشرفين هينزلوا الكلام دا ع الموقع في حاجة إسمها todo list

بيكون فيه تاريخ البدء و تاريخ الإنتهاء للحاجة المطلوبة

ولو محضرتش اي يوم بتقدر تعرف كل حاجة بالظبط كإنك كنت حاضر

6- جدول الكلية الخاص بيك

مش محتاجه تفسير النقطة دي

7- Daily Time Table

ودا عبارة عن جدول لكن جدول غير جدول الكلية

جدول فيه كل المحاضرات والسكاشن المجمعة لو فيه اي ايفينت معين موجوده في الكلية هتلاقيها فيه

كل يوم تفتحه هتشوف اللي عندك في اليوم دا

8- Notifications

لو في اي بوست جديد من الدكتور او المعيد هتلاقي إشعار بكده فوق , مشابه لفيسبوك بالظبط

8- Comments

تقدر تعمل كومنت علي أي بوست مسموح فيه إنك تعمل كومنت

9- Reactions

وكان لازم اعمل حاجة تخلي الناس تتفاعل مع هيئة التدريس , بس دا لو هيئة التدريس حابه كده 😀

اولاً الدكتور بينزل البوست و بيقرر حاجة , هل عاوز علي البوست دا COMMENTS & REACTIONS ولا لا

لو عاوز ف إنك هتقدر تعمل كومنت و رياكشن كمان

الرياكشنز بيها تقدر تعبر للدكتور عن الكلام اللي هو كاتبه هل عاجبك ولا لا

فيه حاجات كتيره جدا ممكن اقعد اتكلم عنها في الموقع لكني معنديش وقت صراحة الفترة دي كلها إمتحانات وانا لازم اخلص كتابة في المقال دا قبل يوم 28

لذلك لو حابب تشوف الموقع ممكن تتواصل معايا و هديلك يوزر تدخل تتصفحه بيه

اه حابب اشكر ناس كتير إللي ساعدوني في إنهم ينزلوا محتوي للطلبة زملائهم علي الموقع ,

وكمان حابب اشكر مرزوق لإنه ساعدني أنشر الموقع و مازال بيساعدني ننشره شكراً صديقي العزيز ♥
دا كان بالنسبة للمحتوي والإدارة

كمان حابب اشكر شخصين من الناس اللي كانوا ديما بيشجعوني شعلان و طارق قمحاوي شكرا على كل الكلام اللي كان عامل كبير في اني اكمل ❤
فيه ناس تانية عاوز اشكرهم لكن هعمل مقال تاني مخصوص بعدين علشان منساش حد منهم إن شاء الله

اما بالنسبة للموقع ك برمجة و تصميم فـ حتي لحظة كتابة المقال دا انا اللي عامل كل حاجة بنفسي حتي اللوجو السيئ الخاص بالموقع انا اللي عامله :’D

الموضوع مٌجهد جداً , مظنش حد هيحس بالكلام دا إلا لو اشتغل قبل كده نفس المقدار من الشغل دا كله لوحده

حالياً انا بدور علي فريق يشتغل معايا في البداية كـ تطوع لكن عاجلاً ام آجلاً هيكون فيه مقابل كويس جدا كمان

اه حتي اللحظة دي الموقع بالنسبالي مليش أي إستفادة منه انا حتي الآن بصرف عليه من مالي الخاص , من إستضافة و غير دا غير الجهد اللي بذلته في إتمامه

انا حالياً بدور علي اكتر من شخص يشتغلوا معايا زي

Front End Web Developer

Back End Web Developer

Graphic Designer

انا مش بدور علي أي حد , انا عاوز حد يكون حابب يشتغل معايا ومقتنع بالفكرة 200% , ولو مكانش بنفس المستوي المطلوب لكنه حابب إنه يشتغل معنديش مانع إني اساعده

اكيد هيكون فيه حد من هيئة التدريس بيقرأ المقال دا , أتمني المشروع يعجب حضرتكم , ممكن لو عند حضرتك أي افكار تتواصل معايا من خلال http://7or.org

او لو إنت أي شخص حتي لو مش في الكلية خالص وحابب تتواصل معايا مفيش أي مشاكل

المشروع هبدأ اطبقه كامل من بداية السنة الدراسية الجديده ( السنة الجاية يعني ) و هبدأ انفذه في اغلب الكليات في الجامعات إللي هقدر اوصلها

لو حضرتك شايف إن الكلام دا كله ملوش لازمه او حاسس انه يعني بمعني اصح ( ولا حاجة) اتمنى متتسرعش في الحكم إلا لما تشوف الموقع من جوه

ولو شفته و برضو مازلت علي موقفك ف انا بإذن اللي فيه تحدي تاني هبدأه من عيدميلادي الـ 22 لـ ال23

لو (انا) فضلت عايش للتاريخ دا

28 /5/2017

إحتمال كبير تغير رأيك و إحتمال اصلا اكون شغال علي مشروع أكبر من دا وقتها

الفترة اللي فاتت انا مهاراتي اتضاعفت في كل لغات البرمجة اللي كانت معايا و اتعلمت حاجات جديده كتير و حالياً بتعلم حاجات تانية

إن شاء الله هحاول اضع الحاجات اللي بتقنها أول بأول في معرض أعمالي هنا

واتمنى أكون عند حسن ظنك يا عزيزي ^^

دا رابط الموقع http://inovbot.com

ودا برنت من داخل صفحة الطالب

ui-768x368

حابب تدخل تتصفح الموقع ممكن تبعتلي هنا علي فيسبوك و هبعتلك يوزر تسجل دخول بيه

لو عندك أي تعليق ممكن تبعته ليا في مسج علي الفيسبوك , او كومنت هنا تحت في المقال او ممكن تبعتلي علي ASK

وشكراً ♥

زي ما قولت في اول المقال إني نقلت المقال لمدونة جديدة ومقدرتش انقلها بالتعليقات فـ دي صورة للتعليقات اللي كانت قبل كده

comments